महिला एसियन कप छनोट : पहिलो खेलमा नेपाल फिलिपिन्ससँग पराजित

काठमाडौं । नेपाल एएफसी मिहला एसियन कप २०२२ को छनोटको पहिलो खेलमा फिलिपिन्ससँग पराजित भएको छ ।

शनिबार भएको समूह एफको पहिलो खेलमा नेपाल २–१ ले पराजित भएको हो ।

खेलमा नेपालले पहिले अग्रता लिएपनि अन्तिम समयमा सम्हालिन नसक्दा पराजय भोग्यो। नेपालले ९० औं मिनेट र इन्जुरी समयको दोस्रो मिनेटमा गोल खान पुगेको थियो ।

उज्वेकिस्तानको जेएआर स्टेडियममा भएको खेलमा विमला चौधरीले खेलको १०औं मिनेटमा गोल गर्दै नेपाललाई अग्रता दिलाएकी थिइन् । यो अग्रता ८९औं मिनेटसम्म कायम थियो।

तर अन्तिममा फिलिपिन्सले २ गोल गर्दै जित निकाल्यो । फिलिपिन्सका लागि ९० औं मिनेटमा ताहनाई अनिशले बराबरी गोल फर्काइन् भने इन्जुरी समयको दोस्रो मिनेटमा कमिल्ला विल्सनले गोल गरेपछि फिलिपिन्स विजयी भयो।

नेपालले अब समूह एफको अर्को खेल हङकङसँग असोज ५ गते खेल्नेछ । समूह विजेता बन्दै एसिया कपमा छनोट हुने सम्भावना कायम राख्न नेपालले हङकङलाई फराकिलो अन्तरमा हराउनुपर्नेछ । समूहको अन्तिम खेल फिलिपिन्स र हङकङबीच असोज ८ गते हुनेछ ।

समूहको विजेताले अर्को वर्ष भारतमा हुने एसिया कपमा स्थान बनाउनेछ ।