मन्त्रीहरुको जिम्मेवारी हेरफेर, परराष्ट्र ओलीले राखे, गृहमा विष्णु पाैडेल

काठमाडाैं। प्रधानमन्त्री केपी शर्मा ओलीले आफूले दुई मन्त्रालयको जिम्मेवारी लिँदै अर्थमन्त्री विष्णु पौडेलसहित अन्य मन्त्रीलाई रिक्त मन्त्रालयको जिम्मेवारी थप गरेका छन्।

प्रधानमन्त्री ओलीले रक्षा र परराष्ट्र मन्त्रालय आफैंसँँग राखेका छन्। पौडेललाई अर्थसँगै, गृह, उद्योग, वाणिज्य तथा आपूर्ति, ऊर्जा, जलस्रोत तथा सिँचाइ मन्त्रालयको जिम्मेवारी दिएका छन्।

यस्तै मन्त्री कृष्णगोपाल श्रेष्ठलाई शिक्षा विज्ञान तथा प्रविधि मन्त्रायसँगै वन तथा वातावरण, युवा तथा खेलकुद, श्रम रोजगार र स्वास्थ्य तथा जनसङ्ख्या मन्त्रालयको जिम्मेवारी दिएका छन्।

भौतिक पूर्वाधार तथा यातायातमन्त्री वसन्तकुमार नेम्वाङलाई कृषि तथा पशुपन्छी विकास, खानेपानी, सञ्चार तथा सूचना प्रविधि र सहरी विकास मन्त्रालयको जिम्मेवारी थप भएको छ।

मन्त्री लीलानाथ श्रेष्ठलाई कानुन, न्याय तथा संसदीय मामिला, भूमि व्यवस्था सहकारी तथा गरिबी निवारण, महिला, बालबालिका तथा ज्येष्ठ नागरिक, संस्कृति पर्यटन तथा नागरिक उडययन र संघीय मामिला तथा सामान्य प्रशासन मन्त्रालयको जिम्मेवारी दिइएको छ।

प्रधानमन्त्री ओलीले प्रतिनिधिसभा विघटन भएपछि गत जेठ २१ र २७ मा विस्तार गरेको मन्त्रिपरिषद्का नयाँ उपप्रधानमन्त्रीसहित २० मन्त्रीलाई सर्वाेच्च अदालतले
८ असारमा मन्त्रिपरिषद विस्तार हुन नसक्ने भन्दै काम गर्न रोक लगाएपछि मन्त्रिपरिषद ५ सदस्यीय बनेको छ।