अझै केही दिन मनसुन नहट्ने, आज यी प्रदेशमा वर्षा

अहिले (शुक्रबार बिहान ७ बजे मौसमविद्सँग कुरा गरेका बेला) प्रदेश १, २, बागमती र गण्डकीका केही स्थानमा हल्का वर्षा भइरहेको छ। 

मौसम पूर्वानुमान महाशाखाका मौसमविद् समीर श्रेष्ठका अनुसार नेपालबाट अझै ३/४ दिन मनसुन (वर्षा गराउने प्रणाली) बाहिरिने संकेत देखिएको छैन। 

‘आगामी ३/४ दिन मनसुन बाहिरिने सम्भावना देखिएको छैन। छिटपुट, हल्का वर्षा भइरहन्छ’, शुक्रबार बिहान उनले भने, ‘ठूलो वर्षाको सम्भावनाचाहिँ छैन।’  

मौसम पूर्वानुमान महाशाखाले शुक्रबार बिहान ६ बजे जारी गरेको मौसम पूर्वानुमान बुलेटिनअनुसार आज दिउँसो (भन्नाले बिहान १०/११ बजेदेखि साँझ ६ बजेसम्मलाई सम्झिनुपर्छ) मौसम देशभर आंशिक (धेरै आकाश खुला, थोरैमा बादल) देखि  सामान्य (धेरैजसो बादल, थोरै खुला) बदली रही लुम्बिनी, कर्णाली र सुदूरपश्चिम प्रदेशका एक/दुई स्थान र बाँकी प्रदेशका थोरै ठाउँमा मेघगर्जनर चट्याङसहित हल्कादेखि मध्यमसम्म वर्षा हुने सम्भावना छ।