देशभर थपिए १,५११ जना कोरोना संक्रमित, ११ जनाको मृत्यु

काठमाडौं । देशभर पछिल्लो २४ घण्टामा १ हजार ५११ जना कोरोना भाइरसका संक्रमित भेटिएका छन्।

स्वास्थ्य तथा जनसंख्या मन्त्रालयका अनुसार ११ हजार २ सय ८ पीसीआर परीक्षणमा १ हजार १६५ जना र ३ हजार ९७१ एन्टिजेन परीक्षणमा ३ सय ४६ गरी १ हजार ५११ जनामा कोरोना संक्रमण देखिएको हो।

यस्तै पछिल्लो २४ घण्टामा कोरोना संक्रमणबाट ११ जनाको मृत्यु भएको छ । अन्य १ हजार ६८९ जना संक्रमणमुक्त भएका छन् ।

यो सँगै नेपालमा कोरोना संक्रमितको कुल संख्या ७ लाख ८१ हजार ९८९ पुगेको भने मृत्‍यु हुनेको संख्या ११ हजार २ पुगेको छ । हालसम्म संक्रमितमध्ये ७ लाख ४५ हजार २१५ जना संक्रमणमुक्त भएका छन् ।