प्रतिनिधिसभाको बैठक ४ असोजसम्मका लागि स्थगित

प्रतिनिधिसभाको बैठक ४ असोजसम्मका लागि स्थगित गरिएको छ । मंगलबारको बैठक करिब १३ मिनेट बसेर सकिएको हो । सभामुख अग्नि सापकोटाले अर्को बैठक ४ असोज सोमबार बिहान ११ बजेका लागि तोकेका छन् ।

आजको बैठकलाई पनि प्रमुख प्रतिपक्षी दल एमालेले अवरोध गरेका थियो । औपचारिक रुपमा बैठक सुरु हुनासाथ एमालेका सांसद्हरु वेल घेर्न पुगेका थिए । कारबाही गरेका सांसदको शुचि प्रकाशित नगरेर पार्टी फुटाउन भूमिका खेलेको भन्दै एमालेले निरन्तर संसद अवरुद्ध पार्दै आएको छ ।

एमालेको विरोधका बीच सभामुख सापकोटाले अर्थमन्त्री जनार्दन शर्मालाई ‘विनियोजन विधेयक २०७८’ माथि विचार गरियोस् भन्ने प्रस्ताव प्रस्तुत गर्न समय दिएका थिए ।

शर्माले प्रस्ताव प्रस्तुत गरेसँगै त्यसमाथि छलफल सुरु भएको थियो । शर्माले जवाफ दिएपछि त्यसमाथि विचार गरियोस् भन्ने प्रस्ताव पनि पारित भएको छ ।