अफगानिस्तानमा अखुन्दजादाको नेतृत्वमा अन्तरिम सरकार घोषणा

एजेन्सी। तालिबानले मंगलबारसाँझ अफगानिस्तानमा अन्तरिक सरकार घोषणा गरेको छ ।

तालिबानले अब अफगानिस्तान इस्लामिक इमिरेड्स भएको समेत बताएको छ ।

तालिबानका प्रवक्ता जबीहुल्लाह मुजाहिदले पत्रकार सम्मेलनमा मुल्ला मुहम्मद हसन अखुन्दजादा सरकारको प्रमुख हुने घोषणा गरे ।

यस्तै मुल्ला अब्दुल गनी बरादर उपप्रमुख हुनेछन् । बरादर तालिबानका सहसंस्थापक हुन् ।

यस्तै गरी तालिबानका संस्थापक मुल्ला उमरका छोरा मुल्ला याकुब रक्षामन्त्री र सिराजुद्दिन हक्कानी गृहमन्त्री हुनेछन् ।

हक्कानी अमेरिकी गुप्तचर एजेन्सी एफबीआईको आतंकवादीको सूचीमा छन् । उनी हक्कानी नेटवर्कका प्रमुख हुन् । तालिबान प्रवक्ताले यो अन्तरिम सरकार भएको बताए ।

उनले भने, ‘हामीलाई थाहा छ कि हाम्रो देशका जनता नयाँ सरकारको प्रतीक्षामा छन् । आगामी दिनमा पूर्ण सरकार गठनको काम हुनेछ । अखुन्दजादा त्यसबेलासम्म मन्त्रिपरिषदका संरक्षक हुनेछन् ।’

तालिबानले १५ अगस्टमा अफगानिस्तानमाथि नियन्त्रण कायम गरेको थियो ।