देउवाले विश्वासको मत लिने भएपछि आन्तरिक छलफलमा जुट्यो माधव पक्ष

प्रधानमन्त्री शेरबहादुर देउवाले पुनर्स्थापित संसद्को पहिलो बैठकमै विश्वासको मत लिने तयारी गरेपछि नेकपा एमाले वरिष्ठ नेता माधवकुमार नेपाल पक्ष आन्तिरक छलफलमा जुटेकको ।

छलफलका लागि नेताहरू भीम रावल, सुरेन्द्र पाण्डे, भीम आचार्य, गोकर्ण विष्ट र सुरेन्द्र पाण्डे लगायतका नेताहरू वरिष्ठ नेता नेपालको निवास कोटेश्वरमा पुगेका छन् ।

प्रधानमन्त्री देउवाले दिउँसो चार बजे बस्ने पुनर्स्थापित प्रतिनिधिसभाको पहिलो बैठक विश्वासको मत लिँदै छन् । देउवाले विश्वासको मत लिनेबारेको प्रस्ताव संसद सचिवालयमा दर्ता भइसकेको छ ।

माधव पक्षका केही नेताहरूले देउवालाई विश्वासको मत दिने बताए पनि यसबारे निर्णय भएको छैन । नेकपा एमालेको ओली पक्षले देउवालाई विश्वासको मत नदिने यसअघि नै स्पष्ट पारेको छ ।

कांग्रेसका ६१, नेकपा माओवादी केन्द्रका ४९, राष्ट्रिय जनमोर्चाका १ र जसपा उपेन्द्र यादवका १७ जना सांसद प्रधानमन्त्री देउवाको पक्षमा छन् । उनका लागि ८ मत अपुग हुन्छ । माधव पक्षका ८ सांसदले मत दिए देउवाले विश्वासको मत पाउने छन् ।

एमालेको नेपाल पक्षका २३ सहित १४६ सांसदले हस्ताक्षर गरेर सर्वोच्च अदालतमा रिट हालेपछि तत्कालीन प्रधानमन्त्रीबाट केपी शर्मा ओली पदमुक्त भएका थिए । सर्वोच्च अदालतको परमादेशपछि प्रधानमन्त्री देउवा गत असार २९ गते प्रधानमन्त्रीमा नियुक्त भएका थिए । संविधानको धारा ७६ (५) अनुसार नियुक्त प्रधानमन्त्रीले एक महिनाभित्र विश्वासको मत लिनुपर्ने संवैधानिक व्यवस्था छ ।