प्रदेश २ मा सर्वसम्मत नेतृत्व चयन गर्नेबारे देउवा-निधिबीच छलफल

काठमाडाैँ । नेपाली कांग्रेसको नेता विमलेन्द्र निधिले यही पुस ६ गते हुने प्रदेश नम्बर २ को अधिवेशनबाट सर्वसम्मत नेतृत्व चयन गर्ने विषयमा सभापति एवं प्रधानमन्त्री शेरबहादुर देउवासँग भेटेर छलफल गरेका छन्। 

प्रधानमन्त्री देउवासँग बालुवाटारमा भएको भेटमा निधिले नेपाली कांग्रेस प्रदेश नम्बर २ को संसदीय दलका नेता समेत रहेका रामसरोज यादवलाई सभापतिमा समर्थन गर्नका लागि आग्रह गरेका थिए। 

सभापतिको दोस्रो चरणको निर्वाचनमा देउवालाई आफूले समर्थन गर्ने निर्णय गर्दा प्रदेश नं २ को संसदीय दलका नेता रामसरोज यादव पनि सँगै रहेको स्मरण गराउँदै निधिले यादव सिनियर नेता पनि भएकोले समर्थन गर्नुपर्ने तर्क अघि सारेका थिए।

प्रदेश नं २ का सभापतिका लागि यादवले उम्मेदवारी घोषणा गरेपछि अर्का नेता कृष्ण यावदले पनि घोषणा गरेका छन्। कृष्णले सभापति देउवाको समर्थनमा आफू उम्मेदवार भएको बताउँदै आएका छन्।