सिरी एमा साम्पाडोरियामाथि युभेन्ट्सको कठिन जित

काठमाडौं । इटालियन सिरी ए मा युभेन्ट्सले साम्पाडोरियामाथि संघर्षपूर्ण जित हात पारेको छ ।

आइतबार साँझ भएको खेलमा युभेन्ट्स ३–२ ले विजयी भयो । युभेन्ट्सको मैदानमा पाउलो डिबालाले खेलको १०औं मिनेटमा गोल गर्दै घरेलु टोलीलाई अग्रता दिलाएका थिए ।

उनी घाइते भएपछि २१औं मिनेटमा मैदानबाट बाहिरिएका थिए। खेलको ४३ औं मिनेटमा लियोनार्डो बोनुचीले पेनाल्टीमा गोल गर्दै युभेन्ट्सलाई २-०ले अघि बढाए।

४४ औं मिनेटमा माया योसिडाले गोल गरेपछि साम्पडोरियाले खेललाई २-१ को अवस्थामा ल्यायो। खेलको ७८ औं मिनेटमा म्यानुएल लोकातेलीले गोल गरेपछि युभेन्ट्स ३-१ ले अघि बढेको थियो ।
साम्पाडोरियाका लागि खेलको ८३औं मिनेटमा एन्टोनियो कान्ड्रेभाले गोल गरेपछि खेल ३–२ को अवस्थामा आयो। त्यसपछि खेलमा दुवै टोलीले गोल गर्न नसकेपछि युभेन्ट्स विजयी भयो।

यो जितसँगै युभेन्ट्स ६ खेलमा ८ अंक जोडेर अंक तालिकाको नवौं स्थानमा रहेको छ भने साम्पडोरिया ५ अंकसहित १४औं स्थानमा छ ।