आजको मौसम : यी प्रदेशमा भारी वर्षा

काठमाडाैँ । हाल गण्डकी, लुम्बिनी र कर्णाली प्रदेशमा सामान्य मौसम बदली छ भने बागमती र सुदूरपश्चिम प्रदेशमा मौसम आंशिकदेखि सामान्यसम्म बदली भएको मौसम पूर्वानुमान महाशाखाले जनाएको छ। साथै अन्य प्रदेशमा मौसम आंशिक बदली छ।

महाशाखाका अनुसार लुम्बिनी प्रदेशका केही तथा गण्डकी, कर्णाली र सुदूरपश्चिम प्रदेशका थोरै स्थानमा भने हल्कादेखि मध्यमसम्म वर्षा भइरहेको छ।

यस्तै आज दिउँसो देशभर मौसम सामान्य बदली रहनेछ। साथै बागमती, गण्डकी, लुम्बिनी, कर्णाली र सुदूरपश्चिम प्रदेशका केही र अन्य प्रदेशका थोरै स्थानमा मेघगर्जनरचट्याङसहित हल्कादेखि मध्यमसम्म वर्षा हुने सम्भावना रहेको महाशाखाले जनाएको छ। यस क्रममा गण्डकी, लुम्बिनी र कर्णाली प्रदेशका एक दुई स्थानमा भारी वर्षाको समेत सम्भावना रहेको महाशाखाले जनाएको छ।

मौसम पूर्वानुमान महाशाखाले मंगलबार बिहान ६ बजे जारी गरेको मौसम पूर्वानुमान बुलेटिनअनुसार राति मौसम देशभर आंशिकदेखि सामान्यसम्म बदली रही बागमती, गण्डकी, कर्णाली र सुदूरपश्चिम प्रदेशका केही र अन्य प्रदेशका थोरै स्थानमा मेघगर्जनरचट्याङसहित हल्कादेखि मध्यमसम्म वर्षा हुने सम्भावना छ।