निर्वाचन आयोग र सभामुखविरुद्ध ओलीको मुद्दा हेर्दाहेर्दैमा

नेकपा (एमाले) का अध्यक्ष केपी शर्मा ओलीले माधवकुमार नेपालसहित १४ संघीय सांसद, सभामुख, निर्वाचन आयोग र लुम्बिनी प्रदेशका २ प्रदेशसभा सदस्यलाई पदमुक्त गर्ने मागसहित दायर गरेको रिट ‘हेर्दाहेर्दै’ मा राखिएको छ।

सोमबार न्यायाधीशद्वय दिपककुमार कार्की र कुमार चुँडालको इजलासमा भएको सुनुवाइ नसकिएकाले मुद्दालाई हेर्दाहेर्दैमा राखिएको हो । निवेदक पक्षका कानुन व्यवसायी, सरकारी वकिल, नेपाल पक्षका कानुन व्यवसायीले बहस गरेका भए पनि निवेदक एमाले अध्यक्ष ओलीको जवाफ बाँकी रहेपछि मुद्दा मंगलबारका लागि हेर्दा हेर्दैमा राखिएको हो ।

माधवकुमार नेपाल नेतृत्वको एकीकृत समाजवादी गठन हुँदा एमालेले कारबाही गरेका १४ जना सांसदलाई पनि सनाखत गरिएको भन्दै त्यसको खारेजी माग गर्दै ओलीले १७ भदौमा सर्वोच्चमा रिट निवेदन दर्ता गरेका थिए । यो मुद्दामाथि २२ भदौमा सुनुवाई गर्दै प्रधानन्यायाधीश चोलेन्द्रशमशेर जबराले कारण देखाउ आदेश जारी गरिसकेका छन् ।