कात्तिक २५ देखि मंसिर ९ गतेसम्म राष्ट्रिय जनगणना हुने

काठमाडौं । राष्ट्रिय जनगणना कात्तिक २५ देखि मंसिर ९ गतेसम्म हुने भएको छ। सरकारले राष्ट्रिय जनगणनाको कार्यतालिका स्वीकृत गरेको हो।

सोमबार बसेको मन्त्रिपरिषद् बैठकले केन्द्रीय तथ्यांक विभागको प्रस्तावअनुसार राष्ट्रिय जनगणना २०७८ को कार्यतालिका स्वीकृत गरेको हो ।

केन्द्रीय तथ्यांक विभागले भदौ २० गतेदेखि जनगणनाका अन्य काम सुरु गर्ने गरी कार्यतालिका प्रस्ताव गरेको थियो ।

जसअनुसार जनगणनाको मूल गणना कात्तिक २५ देखि मंसिर ९ गतेसम्म हुने भएको हो।

विभागको कार्यतालिकाअनुसार भदौ २० देखि २६ गतेसम्म सुपरभाइजर भर्ना गर्ने, भदौ २७ र २८ गते सुपरभाइजरलाई तालिम दिने र भदौ ३० देखि असोज १८ गतेसम्म सुपरभाइजर घरघरमा पुगेर सुचीकरणको काम गर्नेछन् ।

त्यसपछि गणक भर्ना गरी कात्तिक १३ देखि १६ गतेसम्म तालिम दिइनेछ । उनीहरुको तालिमपछि मूल गणना कात्तिक २५ देखि मंसिर ९ गतेसम्म हुनेछ ।

यसअघि विभागले असार ८ गतेदेखि जनगणना सुरु गर्ने तयारी गरेपछि कोरोना महामारीका कारण रोकिएको थियो।