कमेडी च्याम्पियनबाट बाहिरिए हिक्मत, उपाधिको लागि भरतमणि, विक्की र सन्तोषबीच प्रतिष्पर्धा

‘कमेडी च्याम्पियन सिजन २’ को उत्कृष्ट चारबाट कञ्चनपुरका हिक्मत महरा बाहिरिएका छन् । प्रतियोगिताबाट उनी बाहिरिएसँगै कमेडी च्याम्पियनले आफ्नो उत्कृष्ट तीन फाइनलिस्ट पाएको छ ।

सिजन २ को फाइनलिस्टमा ताप्लेजुङका भरतमणि पौडेल, सिक्किमका विक्की अग्रवाल र गोरखाका सन्तोष थापा परेका छन् । यी तीनले उपाधिको लागि प्रतिष्पर्धा गर्नेछन् ।

उत्कृष्ट चारमा उत्कृष्ट प्रस्तुती दिँदै भरतमणिले सिधै उत्कृष्ट ३ मा स्थान बनाएका थिए । विक्की र सन्तोष भने भोटमार्फत् उत्कृष्ट तीनमा छनोट भएका हुन् ।

कमेडी च्याम्पियनका प्रतियोगीहरुको लागि बुधबार दिउँसो १२ बजेसम्म भोट गर्न पाइन्छ । यसअर्थमा को प्रतियोगी सुरक्षित भए वा को बाहिरिए भन्ने कुरा बुधबार नै निर्माण पक्षलाई थाहा हुन्छ । बुधबार नै शुक्रबार र शनिबार प्रशारण हुने भागको छायांकन गरिन्छ ।

आज उत्कृष्ट तीनको प्रस्तुती निर्माणपक्षले छायांकन गरिसकेको छ । सन्तोष, भरत र विक्कीले फाइनलको लागि प्रस्तुती दिइसकेका छन् । अब जसले धेरै भोट ल्याउन सक्यो जित उसैको हुनेछ ।

कमेडी च्याम्पियनको फाइनल असोज २ गते हुनेछ ।