एमाले निर्वाचन आयोगको निर्णयविरुद्ध कानुनी प्रतिवाद गर्ने

नेकपा एमालेले निर्वाचन आयोग र राजनीतिक दलसम्बन्धी ऐन संशोधन गर्न ल्याइएको अध्यादेशविरुद्ध कानुनी प्रतिवाद गर्ने भएको छ ।

ललितपुरको च्यासलमा बिहीबार बसेको केन्द्रीय कमिटी बैठकले आयोग र अध्यादेशविरुद्ध सर्वोच्च अदालतमा रिट दायर गर्ने निर्णय गरेको हो ।

बैठकपछि सञ्चारकर्मीसँग कुराकानी गर्दै सचिव प्रदीप ज्ञवालीले दुईवटा विषयमा सर्वोच्च अदालत जाने निर्णय भएको जानकारी दिए । पार्टीले निष्कासन गरिसकेका व्यक्तिलाई निर्वाचन आयोगले नयाँ दल दर्ताका लागि सनाखतमा समावेश गराएको भन्दै आयोगको उक्त निर्णयविरुद्ध अदालत जाने निर्णय भएको उनको भनाई छ ।

बैठकले अलग दल (नेकपा एकीकृत समाजवादी) दर्ता गरेकालाई निष्कासन गरी निर्वाचन आयोगलाई जानकारी दिने निर्णय गरेको छ । कसैले भुल महसुस गरेर निर्णय सच्याउन चाहेमा ‘ढोका खुलै राख्ने’ निर्णय भएको पनि ज्ञवालीले जानकारी दिए ।