नयाँ पुस्तामा चिनिँदा खुसी छन् यश कुमार

२० वर्ष अगाडि यश कुमारले ‘तिम्रो मन बदलिएछ… ‘ बोलको गीत सार्वजनिक गरे । जुनसमय यस गीतले राम्रो बजार पायो । धेरैले गीतलाई रुचाए ।

अहिले यशले आफ्नो २ दशक पूरानो गीतलाई रि-रेकर्ड गरेर सार्वजनिक गरेका छन् । जसमा यश र मिलन नेवारको स्वर सुन्न सकिन्छ । भिडियोमा सागर लम्साल ‘बले’ र प्रिन्सी-प्रिज्माले अभिनय गरेका छन् ।

रि-रेकर्ड भएर आएको यस गीतले पनि तहल्का नै पिटेको छ । रिलिज भएको दुई साता नपुग्दै गीतले युट्युबमा ४० लाख हाराहारी दर्शक पाएको छ । १ लाख ३३ हजारले लाइक गरेका छन्, ७ हजार हाराहारी कमेन्ट आएका छन् ।

यो सफलता यशले सोचेको भन्दा भिन्न छ । यशलाई नयाँ पुस्ताले आफ्नो गीत मन नपराउने हो कि भन्ने डर थियो । तर, अहिलेको पुस्ताले गीतलाई रुचाएको देख्दा यश आफैंमा दंग छन् ।

उनी भन्छन्, ‘२ दशकपछि गीतले पुनर्जन्म पायो । त्योसँगै मैले पनि पुनर्जिवन पाए । नयाँ पुस्ताले मलाई चिन्न थाल्यो । निकै खुसी छु म ।’

अहिले डिजिटल युग हो । धेरै कुराहरु डिजिटल भइसके । एक क्लिकमा जुनसुकै गीत-संगीत सुन्न सकिन्छ/भेटिन्छ । तर, यशको यो गीत कतै थिएन । त्यसैले गीतलाई बचाइराख्न पनि रि-रेकर्ड गराएको यश बताउँछन् ।

यशले २० वर्ष अगाडि आफ्नो प्रेम टुक्रिएपछि ‘तिम्रो मन बदलिएछ…’ गीतको शब्द कोरेका थिए । सामान्य मनमुटावमा छुट्टिएपछि उनले त्यसलाई गीतको रुप दिएका थिए । त्यसबेला उनको पीडालाई धेरैले रुचाए ।

अहिले पनि आफ्नो गीतलाई रुचाउने कारणबारे यश भन्छन्, ‘प्रेम गर्ने शैलि फेरिएछ, मन दुख्ने/टुक्रिने शैलि फेरिएको रहेनछ ।’