कोरोना संक्रमित पूर्व राजारानी र छोरी प्रेरणा नर्भिकमा भर्ना

काठमाडौं । कोरोना संक्रमणपछि घरमा नै आराम गरिरहेका पूर्व राजा ज्ञानेन्द्र शाह, पत्नी कोमल र छोरी प्रेरणा राज्यलक्ष्मी सिंह नर्भिक अस्पतालमा भर्ना भएका छन् ।

पूर्वराजपरिवारका तीन जना सदस्य कोरोना संक्रमणका कारण शनिबार दिउँसो नर्भिक अस्पतालमा भर्ना भएका हुन् ।

भारतको हरिद्वारको कुम्भ मेलामा सहभागी भएका पूर्वराजा ज्ञानेन्द्र शाह र उनकी पत्नी कोमललाई नेपाल आएपछि गरेको परीक्षणमा कोरोना पुष्टि भएको थियो । कुम्भ मेलाबाट पूर्वराजा गत आइतबार नेपाल फर्किएका हुन् ।

पूर्वराजाले नेपाल फर्किनुअघि नयाँदिल्लीमा परीक्षण गराएपनि कोरोना संक्रमण देखिएको थिएन । हवाईयात्राका लागि ७२ घण्टाभित्रको परीक्षण प्रतिवेदन आवश्यक पर्ने भएकाले दिल्लीमा कोरोना परीक्षण गरिएको थियो ।