चालु आर्थिक वर्षको अन्तिम दिन नेप्सेमा दोहोरो अङ्कको वृद्धि

काठमाडाैं। शेयर कारोबारको अन्तिम दिन आज नेप्से परिसूचक दोहोरो अंकले वृद्धि हुँदा बजार पूँजीकरण ४० खर्ब १० अर्ब ९५ करोड ७८ लाख १० हजार बराबर पुगेको छ।

विगत केही दिनदेखि झिनो अङ्कले मात्रै उकालो लागेको नेप्से बिहीबार भने ११.३३ अङ्कले वृद्धि भई दुई हजार ८८३.२८ मा पुगेको हो। यस्तै ठूला कम्पनीको शेयर कारोबार मापक सेन्सेटिभ परिसूचक १.९३ बिन्दुले उकालो लागेर ५४१.३१ मा पुगेको छ।

कुल २२३ कम्पनीको पाँच करोड ८५ लाख दुई हजार १०९ कित्ता शेयर आठ अर्ब १४ करोड ३६ लाख १४ हजार ३०२ मा कारोबार भएको छ। चालु आर्थिक वर्षको आज अन्तिम दिन बजारले सकारात्मक संकेत गर्दै विदा भएको छ।

नेप्सेका अनुसार बिहीबार जलविद्युत् उपसमूहको शेयर उकालो लागेको छ। सो उपसमूहको शेयर ५६.१४ बिन्दुले बढेको छ। कुल १३ उपसमूहमध्ये सात उपसमूहको शेयर उकालो लागेको छ भने छ उपसमूहको शेयर भने ओरालो लागेको छ।

बैंकिङ ६.३, व्यापार २८.७१, जलविद्युत् ५६.१४, वित्त ४७.८९, निर्जीवन बीमा ३६.२६, लघुवित्त ४५.७१ र सामूहिक लगानी कोष ०.०७ बिन्दुले बढेको छ । यस्तै, होटल तथा पर्यटन ५०.३८, विकास बैंक १३.६६, उत्पादन ५.८७, अन्य ७.८१, जीवन बीमा ४३.११ र लगानी ०.०१ बिन्दुले ओरालो लागेको छ।