क्रोएसिया अन्तिम १६ मा प्रवेश

काठमाडौं । क्रोएसिया १६ औं संस्करणको युरोकप फुटबलको नकआउट चरणमा प्रवेश गरेको छ । क्रोएसिया समूह उपविजेता बन्दै नकआउट चरणमा प्रवेश गरेको हो ।

मंगलबार राति भएको खेलमा स्कटल्यान्डमाथि ३–१ गोलको जित निकालेको हो । समूह चरणको अन्तिम खेलमा जित निकाल्दै क्रोएसिया समूह उपविजबेता बनेको हो ।

ह्याम्पडेन पार्कमा भएको खेलमा क्रोएसियालाई जित दिलाउन निकोला भ्लासिच, लुका मोड्रिच र इभान पेरिसिचले एक–एक गोल गरे । स्कटल्यान्डका कलुम म्याकग्रिगोरले एक गोल फर्काए ।

क्रोएसियाका लागि खेलको १७ औं मिनेटमा निकोलाले गोल गर्दै टिमलाई अग्रता दिलाएका थिए । ४२ औं मिनेटमा कलुमले गोल गर्दै स्कटल्यान्डलाई १–१ गोलको बराबरीमा फर्काए ।

खेलको ६२ औं मिनेटमा कप्तान मोड्रिचले गोल गर्दै क्रोएसियाको अग्रता दोब्बर पारे । ७७ औं मिनेटमा पेरिसिचले गोल गर्दै क्रोएसियालाई ३–१ को जित दिलाए ।

जितसँगै समूह ‘डी’ को क्रोएसियाले ३ खेलबाट ४ अंक जोड्यो । स्कटल्यान्ड भने प्रतियोगिताबाट बाहिरिएको छ ।