जब गंगामा तैरिरहेको बाकसभित्र भेटिइन् २१ दिनकी बच्ची

सोमबार गंगा स्नान गर्न गएका स्थानीय गुल्लु मल्लाहको कानमा अचानका शिशु रोएको आवज गुन्जियो । सुरुमा उनलाई अचम्म लाग्यो । यता-उती हेरे । गंगामा बग्दै गरेको एउटा बाकस भित्रबाट शिशु रोएको आवाज आइरहेको थियो । धेरै जना भएको गंगामा बाकस खोल्ने आँट कसैले गरेनन् ।

तर, बाकसभित्र शिशु निरन्तर रोइरहेपछि उनको मन मानेन । गुल्लु गंगामा हेलिएर बाकसलाई किनारमा ल्याए । उनले बाकस खोले ।

बाकस खोल्दा आफू अचम्ममा परेको उनी बताउँछन् । बाकसमा रातो कपडामा बेरिएकी एउटी २१ दिनको बच्ची थिइन् । साथमा थियो माता दुर्गाको तस्वीर र उनको नामसहितको जन्मदर्ता । बच्चीमा चोटपटकसमेत नभएको बताउँछन् उनी ।

जन्ममिति र उनको नाम लेखिएको सो कागजमा ‘मैले गंगा मातालाई कन्यादान गरेको छु,  ॐ जय माँ दुर्गा’ लेखिएको थियो ।

बच्चीलाई गुल्लुले आफ्नी छोरीजस्तै बनाएर पाल्ने विचार गरेर घर ल्याए । घरमा ल्याएकी बच्चीलाई उनकी बुहारीले दूध खुवाइन र बच्ची शान्त भइन् ।

घटना भएको कुरा प्रहरीले थाहा पाइसकेको थियो र प्रहरीले बच्चीलाई अस्पताल भर्ना गर्‍यो ।

सो घटनाबारे थाहा पाएपछि उत्तर प्रदेशका मुख्यमन्त्री योगी आदित्यनाथले बच्चीको सबै लालनपालन राज्य सरकारले गर्ने बताएका छन् । साथै बच्चीको उद्धार गर्ने गुल्लुले मानवीयताको अनुपम नमूना देखाएका भन्दै सरकारी सुविधा दिने घोषणासमेत गरेका छन् ।

ती बच्चीलाई कसले र किन त्यसरी गंगामा बगायो भन्ने खुलिसकेको छैन । प्रहरीले घटनाको अनुसन्धान गरिरहेको जनाएको छ ।