मेलम्चीको बाढीले ७ को मृत्यु, ५० बढी बेपत्ता

काठमाडौँ । अविरल वर्षापछि सिन्धुपाल्चोकस्थित मेलम्ची नदीमा आएको बाढीले हेलम्बुमा ७ जनाको मृत्यु भएको छ।

प्रमुख जिल्ला अधिकारी अरूण पोखरेलले सेतोपाटीलाई दिएको जानकारीअनुसार मंगलबार साँझ आएको बाढीले बगाएर ७ जनाको मृत्यु भएको पुष्टि भएको छ।

‘हेलम्बु गाउँपालिकामा अहिलेसम्मा ७ जनाको मृत्यु भएको पुष्टि भएको छ,’ उनले भने, ‘घर, टहरा, पुललगायत संरचना बगेका छन्।’ बाढीले मेलम्ची बजारमा पनि क्षति पुर्‍याएको छ।

‘मेलम्चीमा अहिलेसम्म मानवीय क्षतिको विवरण आएको छैन। उद्धार गर्नुपर्ने देखिएको छ,’ उनले भने, ‘नेपाली सेना र निजी एअरलाइन्सका हेलिकप्टर उद्धारका लागि परिचालन गर्न लागेका छौं।’ घरका छतमा रहेकाहरूको उद्धार गर्न लागिएको उनले बताए। सडक मार्गबाट पनि उद्धारका लागि टिम परिचालन गरिएको उनले बताए।