कांग्रेस केन्द्रीय कार्यसमिति बैठक बिहीबारलाई डाकियो

नेपाली कांग्रेसको केन्द्रीय कार्यसमितिको बैठक ३ असार बिहीबार बस्ने भएको छ ।

पार्टी केन्द्रीय कार्यालयका मुख्यसचिव कृष्णप्रसाद पौडेलले शनिबार एक विज्ञप्ति जारी गरी ३ असार दिउँसो २ बजे पार्टी केन्द्रीय कार्यालय सानेपामा बैठक बस्न लागेको जानकारी दिएका हुन् ।

बैठकमा पार्टीको आसन्न १४औँ महाधिवेशन र समसामयिक राजनीति घटनाक्रमबारे छलफल हुने मुख्यसचिव पौडेलले बताए ।

कांग्रेसले बैठकमा सहभागी हुनका लागि पार्टीका केन्द्रीय कार्यसमितिका पदाधिकारी, केन्द्रीय सदस्य तथा आमन्त्रित केन्द्रीय सदस्यलाई उपस्थितिका लागि निर्देशानुसार अनुरोधसमेत गरेको छ ।
कांग्रेसको १४औँ महाधिवेशन आगामी भदौ १६ देखि १९ गतेसम्म हुने भएको छ । शनिबार पार्टी सभापति शेरबहादुर देउवा निवासमा बसेको बैठकले सो मितिमा काठमाडौंमा महाधिवेशन गर्ने निर्णय लिएको थियो ।

यस्तो छ कार्यतालिकाको अन्तिम मिति

२० असार : क्रियाशील सदस्यता छानबिन समितिले अन्तिम सदस्यता सूची केन्द्रीय समितिमा बुझाउने
२४ असार भित्र : क्रियाशील सदस्यताको अन्तिम सूची
६ साउन : गाउँ/नगर वडा अधिवेशन
११ साउन : स्थानीय तहको अधिवेसन अधिवेशन
१६ साउन : प्रदेशसभा क्षेत्रीय अधिवेशन एक प्रतिनिधिसभा क्षेत्र भएका जिल्ला
२० साउन : प्रतिनिधिसभा क्षेत्रीय अधिवेशन तथा एक प्रतिनिधिसभा क्षेत्र भएका जिल्ला
२४ साउन : प्रतिनिधिसभा क्षेत्रीय अधिवेशन एकभन्दा बढी प्रतिनिधिसभा निर्वाचन क्षेत्र भएका जिल्ला
१ र २ भदौ : प्रदेश अधिवेसन
भदौ १६ देखि १९ : केन्द्रीय अधिवेसन