गोरखाका कांग्रेस नेता प्रेम खत्रीले गरे ६ वटा एम्बुलेन्स सहयोग

पर्यटन व्यवसायी तथा नेपाली कांग्रेसका नेता प्रेमकुमार खत्रीले ६ वटा एम्बुलेन्ससहित स्वास्थ्य सामग्री सहयोग गरेका छन् । उनले गोरखाका ५ वटा स्थानीय तहलाई गोरखा नगरपालिकाको कार्यालयमा नै एक कार्यक्रम गरेर उक्त सहयोग हस्तान्तरण गरेका हुन् ।

कांग्रेसका केन्द्रीय सदस्य सुरेन्द्रराज पाण्डेले एम्बुलेन्सको साँचो र स्वास्थ्य सामग्री स्थानीय तहका प्रमुख तथा उपप्रमुखहरूलाई हस्तान्तरण गरेका थिए ।

गोरखा नै घर भएका खत्रीले सम्भव नेपालमार्फत् गोरखा नगरपालिकाका लागि २ वटा एम्बुलेन्स, शहिद लखन गाउँपालिकाका लागि १, भीमसेन थापा गाउँपालिकालाई १, गण्डकी गाउँपालिकालाई १, धार्चे गाउँपालिकालाई १ एम्बुलेन्स र स्वास्थ्य सामग्री उपलब्ध गराएका हुन् ।

यस्तै उनले ६ थान अक्सिजन सिलिन्डर, ६ सय थान एन्टिजेन्ट किट, एक हजार दुई सय थान भिटिएम, ८ सय लिटर सेनिटाइजर, ५६ हजार सर्जिकल मास्क, एक सय थान अक्सिमिटर, पिपिईसेटलगायत सामग्री हस्तान्तरण गरेका छन् ।

सामाजिक सेवमा लागिरहेका खत्रीले यसअघि पनि धेरै सहयोग गर्दै आएका छन् ।