मुगुमा पहिलो पटक कोरोनाबाट एकजनाको मृत्यु

मुगु। कोभिड–१९ सङ्क्रमणबाट पहिलोपटक एक वृद्धको मृत्यु भएको छ। मृत्यु
हुनेमा छायाँनाथ रारा नगरपालिका–१० का ७० वर्षीय पुरुष रहेको जिल्ला स्वास्थ्य कार्यालयका सूचना अधिकारी परशुराम नेपालीले जानकारी दिए।

उनका अनुसार ती वृद्धालाई अस्पताल ल्याउने क्रममा आज बाटोमा नै मृत्यु भएको थियो। एकहप्तादेखि बिरामी हुँदा पनि ती वृद्धा अस्पतालमा जान नमानि घरमा नै रही जडिबुटी सेवन गरेको बताइएको छ।

वृद्धाको मृत्युपछि गरिएको एन्टिजेन परीक्षण गर्दा पोजेटिभ रिपोर्ट आएको सूचना अधिकारी नेपालीले बताए। गत वैशाखदेखि जिल्लामा सङ्क्रमित सङ्ख्या वृद्धि भएपनि मृत्यु भएको थिएन।

हालसम्म २९४ सङ्क्रमित रहेका जिल्ला प्रशासन कार्यालयद्वारा जारी विज्ञप्तिमा जनाइएको छ।