नेप्सेको सीईओमा नारद लुँइटेल नियुक्त

काठमाडौं । नेपाल स्टक एक्सचेन्ज (नेप्से) को प्रमुख (सीईओ) मा नारद लुँइटेल नियुक्त भएका छन् । आज (सोमबार) साँझ बसेको मन्त्रिपरिषद् बैठकले लुँइटेललाई सीईओ नियुक्त गरेको एक मन्त्रीले जानकारी दिएका छन् । लुइँटेल तारागाउँ विकास समितिको सदस्य सचिव भइसकेका व्यक्ति हुन् ।

नेप्सेको नयाँ सीईओ छनोटका लागि अर्थ मन्त्रालयले गठन गरेको सिफारिस समितिले प्रारम्भिक चरणमा पाँच जनाको नाम सर्टलिस्ट गरेको थियो । समितिले नारदकुमार लुइँटेलसँगै चूडामणि चापागाईं, पूर्णप्रसाद आचार्य, बद्रीप्रसाद प्याकुरेल र हेमन्त बस्याललाई अन्तिम चरणको प्रतिस्पर्धामा समेटेको थियो । पाँचै जनाले बुधबार अर्थ मन्त्रालयमा व्यक्तिगत अन्तर्वार्ता दिँदै आ–आफ्नो कार्ययोजना प्रस्तुत गरेका थिए। कार्ययोजना र अन्तर्वार्ताको आधारमा सिफारिस समितिले तीन जनाको नाम सिफारिस गरेपछि मन्त्रिपरिषद्ले लुइँटेलको नाममा टुंगो लगाएको हो ।

यसअघिको प्रक्रिया अनुसार अर्थ मन्त्रालयले सहसचिव सेवन्तक पोखरेलको संयोजकत्वमा सिफारिस समिति गठन गरेको थियो। समितिमा अर्थ मन्त्रालयकै सहसचिव अमृत लम्साल र विज्ञ सदस्य खोमराज खरेल थिए । नेप्सेमा तत्कालीन सीईओ कृष्णबहादुर कार्कीको कार्यकाल माघ २५ मा सकिएपछि पद खाली रहँदै आएको थियो। अब लुइँटेलले नेप्सेको सीईओको जिम्मेवारी सम्हाल्ने भएका छन् ।