कोरोनाबाट थप २१४ जनाको मृत्यु, ९,२४७ जना संक्रमित

काठमाडौं। कोरोना भाइरसको संक्रमणबाट पछिल्लो २४ घन्टामा २१४ जनाको मृत्यु भएको छ।

यसैगरी ९ हजार २४७ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।

पछिल्ला ३ दिनदेखि मृत्यु हुने र संक्रमितको संख्या घटेपछि सोमबार पुनः बढेको छ । नेपालमा कोरोना संक्रमणबाट हालसम्म ५ हजार २१५ जनाको मृत्यु भइसकेको छ ।

पछिल्लो २४ घण्टामा २१ हजार ६५३ पीसीआर परीक्षणमा ९ हजार १९८ जना र ४३४ एन्टिजेन परीक्षणमा ४९ जना गरी ९ हजार २४७ जनामा संक्रमण पुष्टि भएको हो । योसँगै कोरोना संक्रमितको संख्या ४ लाख ६४ हजार २१८ पुगेको छ।

जसमध्ये सक्रिय संक्रमितको संख्या एक लाख १३ हजार ४८० पुगेको छ । जसमध्ये एक लाख ६ हजार ५१० जना होम आइसोलेसनमा छन् भने छ हजार ९७० जना संस्थागत आइसोलेसनमा छन् ।

यसैगरी आईसीयूमा एक हजार २५९ जना र भेन्टिलेटरमा चार सय जना उपचाररत छन्।
पछिल्लो २४ घण्टामा पाँच हजार ७६७ जना कोरोनामुक्त भएका छन्। हालसम्म संक्रमणमुक्त हुनेको संख्या तीन लाख ५५ हजार २२३ पुगेको छ ।