![](https://forwardkhabar.com/wp-content/uploads/2024/08/Rabi-Lamichhane2024-1-80x100.jpg)
![](https://forwardkhabar.com/wp-content/uploads/2021/08/MCC.jpg)
काठमाडाैँ । राष्ट्रपति विद्यादेवी भण्डारीले मंसिर २८ गतेदेखि शुरू हुने गरी संघीय संसदको हिउँदे अधिवेशन आह्वान गरेकी छन् । मन्त्रिपरिषद्को सिफारिसमा राष्ट्रपति भण्डारीले बिहीवार संसदको अधिवेशन आह्वान गरेकी हुन् ।
सरकारको सिफारिसमा राष्ट्रपतिबाट ६ अध्यादेश जारी गरेको भोलिपल्ट संसदको अधिवेशन आह्वान गरिएको हो । यसअघि साउन ३० गते पुनःस्थापित प्रतिनिधि सभाको पहिलो अधिवेशन अन्त्य गरेर सरकारले राजनीतिक दल सम्बन्धी अध्यादेश ल्याएको थियो ।
कात्तिक १२ गते प्रतिनिधि सभाको अधिवेशन अन्त्य गरेर सरकारले त्यसको १ महिनापछि अधिवेशन आह्वान गर्न सिफारिस गरेको छ । मंसिर २८ गते शुरू हुने अधिवेशनको मुख्य कार्यसूची अमेरिकी आर्थिक सहयोग कार्यक्रम एमसीसी अनुमोदन हुने रहेको सत्तारुढ दलनिटक स्रोतले लोकान्तरसँग भन्यो ।
एमसीसीबारे सत्तारुढ दलहरूबीच विवाद छ । नेपाली कांग्रेस र जनता समाजवादी पार्टी एमसीसी अनुमोदनको पक्षमा छन् भने नेकपा माओवादी केन्द्र, नेकपा एकीकृत समाजवादी र राष्ट्रिय जनमोर्चा एमसीसी अनुमोदन गर्न नहुने पक्षमा छन् ।
सत्तारुढ दलभित्रै मतभेद रहेको भन्दै नेकपा एमाले एमसीसीबारे अनिर्णित छ । यद्यपि एमाले अध्यक्षमा पराजित भीम रावललगायत केही सांसदले एमसीसीको विरोध गर्दै आएका छन् । दलहरूबीचको मतभेदकै कारण एमसीसी लामो समयदेखि प्रतिनिधि सभामा विचाराधीन छ ।
संयुक्त राष्ट्रसंघको महासभाका दौरान र हालै मात्र नेपाल भ्रमणमा आएका अमेरिकी सहायक मन्त्रीको नेपाल भ्रमणका क्रममा प्रधानमन्त्री शेरबहादुर देउवाले संसदबाट एमसीसी अनुमोदन गर्ने प्रतिबद्धता जनाएका थिए ।
मंसिर ३ गते अमेरिकी सहायक विदेशमन्त्री डोनाल्ड लुले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँगको भेटमा एमसीसी अनुमोदनका लागि डिसेम्बर १४ अर्थात् मंसिर २८ गतेसम्मको समय दिएका थिए । संयोगले संसदको अधिवेशन सोही दिन प्रारम्भ हुँदैछ ।
‘मंसिर दोस्रो साताबाट संसदको हिउँदे (विधेयक अधिवेशन) बोलाउने परम्परा नै हो, यो सदनको मुख्य कार्यसूची एमसीसी हुने प्रबल सम्भावना छ,’ सत्तारुढ दलका एक नेताले भने । बुधवार अध्यादेश जारी गरेर बिहीवार प्रतिनिधि सभाको अधिवेशन बोलाउनुलाई अर्थपूर्ण रूपमा हेरिएको छ । नेकपा एमाले र नेपाली कांग्रेसको महाधिवेशनका कारण संसदको अधिवेशन ढिलो गरी शुरू हुन लागेको हो ।
माधव नेपाललगायत १४ सांसदलाई पदमुक्त गर्न गरिएको सिफारिस कार्यान्वयन नगरेको भन्दै एमालेले यसअघि प्रतिनिधि सभाको सिंगो अधिवेशन अवरुद्ध गरेको थियो । भदौ २६ गतेदेखि शुरू भएको प्रतिनिधि सभाको अधिवेशन कात्तिक १२ गते अन्त्य गरिएको थियो ।
फर्वाडखबर डटकममा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउन वा 9867415506/9847728821 फोन गर्न सक्नुहुने छ ।
![Avatar photo](https://forwardkhabar.com/wp-content/uploads/2023/07/cropped-unnamed-96x96.jpg)