मुख्यमन्त्री भीम आचार्यको पदको छिनोफानो आइतबार

अल्पमतमा रहेका प्रदेश १ का मुख्यमन्त्री भीम आचार्यको पदको छिनोफानो कात्तिक ७ गते हुने भएको छ । उनले कात्तिक ७ गते दिउँसो १२:३० बजे बस्ने प्रदेशसभा बैठकमा विश्वासको मत लिने भएका हुन् ।

जसका लागि उनले शुक्रबारको प्रदेश सभा बैठकमा प्रस्ताव पेस गरिसकेका छन् । शुक्रबार बसेको कार्यव्यवस्था समितिको बैठकपछि मुख्यमन्त्री आचार्यले प्रदेश सभाको शुक्रबारको बैठकमा संविधानको धारा १८८ को उपधारा २ तथा प्रदेश १ को प्रदेश सभा नियमावली २०७४ को नियम १२८ को उपनियम ४ बमोजिम विश्वासको मत लिने प्रस्ताव प्रस्तुत गरेका हुन् ।

मुख्यमन्त्रीले प्रस्ताव पेस गरिसकेपछि सभामुख प्रदीपकुमार भण्डारीले ७ कात्तिक आइतबार दिउँसो साढे १२ बजेसम्मका लागि संसद्को बैठक स्थगित गराएका छन् । दर्ता भएको उक्त प्रस्तावउपर प्रक्रिया मिलाएर मतदान भने आइतबार हुने प्रदेशसभा सचिवालयले जनाएको छ । १० भदौमा नियुक्त भएका मुख्यमन्त्री आचार्यले २५ असोजमा प्रदेश सभा सचिवालयमा विश्वासको मत लिने प्रस्ताव दर्ता गराएका थिए ।